Ein song vart eit dikt som igjen vart ein dans.
 
”Eg er Lisa, eg er fin i den nye kjolen min,”
syng Lisa. Ho er på veg til skulen. 
Ho dansar og syng.
Ho har ny kjole og ny sekk 
og ho har ein hemmeleg kjærast som berre ho veit om.
Han med eit hemmeleg namn.
 
Det lange diktet ”Han med eit hemmeleg namn” står i barneboka ”Trøysteboka” (Fonna forlag 2011).Atle Hansen har skrive det med utgangspunkt i den kjende barnesongen om Lisa som går til skulen. Men her tek forteljinga ei anna vending enn i songen. Då Hansen skreiv dette diktet gjorde han det med tanke på at det skulle framførast saman med ein dansar. Difor dansar teksten av garde i lette rytmar og rim og har innslag av song og regler og nonsensdikt.
 
Saman med dansaren Magdalena From Delis har Atle Hansen laga den vesle førestellinga ”Eg er Lisa, eg er fin” som inneheld både dikt og dans, song og leik med ord og rytmar. 

Alt framført av deira kroppar og stemmer.
Ho dansar og syng. Han les og syng.