Seljestad sin debutroman Blind (2005) skapa ein langvarig debatt knytt til klassereiseproblematikken. Få bøker har som denne sett dagsorden i det litterære og politiske feltet.
Seinare kom boka Bastard, ein sjangerhybrid, både sjølvbiografi og essay og fiksjon. Bastard handlar om hans eiga klassereise frå Oddas arbeidarklasse til akademia og den forma for framandgjering og ambivalens som mange klassereisande opplever i møtet med sitt nye miljø.
I 2009 kom Lars Ove med den kritikarroste tredjeboka, Frægd, ein oppvekstroman frå ein fruktgard i Hardanger. Romanen låner både form- og innhaldselement frå norrøn versedikting, og er ei bok med mange stilnivå og ein burlesk tone. Hausten 2011 kom romanen Fjorden, og i 2012 romanen Isberg, som vart nominert til Ungdommens kritikarpris.
Med "Kjære bror" (2014) var Seljestad tilbake i romansjangeren, noko han også gjorde med "Ta hand om deg" (2017). "Snøen stryk ut alle spor" (2019) er den tredje romanen på rad som favnar djupt i tette familieband.
Storspring. Eit fabrikkdikt (2013) var Seljestads lyrikkdebut. På den faste programposten på symposiet, "Smelteverket rundt på 100 minutt", les han dikt herifrå inne i fabrikkhallane. I 2020 kom ei ny diktbok frå Seljestad: Lyden av stein som flyttar seg under vatn.
Med "Eitranes" (2022) slutta han sirkelen om bøker om klasse og arbeidarkultur.
Han fekk LOs kulturpris i 2019.
