Symposieutstillar i år er fotograf Ingerid Jordal. Ingerid er, som forfattarane ho har fotografert, utflytta odding. Jordal har blitt med årets gjestande Oddaforfattarar heim.

Kor er heim? Det er over 25 år sidan Marit Eikemo flytta frå huset til på Berjaflot, men ho snakkar framleis om at ho reiser heim til Odda. Både Lars Ove Seljestad og Frode Grytten har gjort det til karriere å vere frå Odda. Barndomsheimen til Frode på Hjøllo står der den alltid har stått, og han vender stadig tilbake. Men i kvardagen er det vel Bergen og familien der som er heim? Lars Ove har ingen barndomsheim å koma heim. Mora har fått ny leilighet i Bygda, og når han er heima, søv han i Tyssedal. Knut Olav Åmås sa lenge at han kjem ikkje frå Odda, han kom frå Odda. Koss ser han på det i dag?

Er heimen der familien din er? Far til Hilde Danielsen har flytta frå Odda til Herand. Det er dit ho reiser når ho skal heim. Svein Ivar Angell reiser heim til familien i Skare, og heim til familien i Bergen.

- Eg er heima i Odda, men eg eg har ingen heim i Odda lenger. Far arbeidde på Smelteverket, og som smelteverksarbeidarar flest, leigde han hos fabrikken. Under oppveksten min flytta me difor rundt i Røldalsvegen ettersom familien auka eller far steig i gradene. I Bygda, der mor mi bur no, har eg funne meg eit hjørna av sofaen som er mitt.

Lars Ove Seljestad, hos mor Gerd Seljestad