Fotograf Jarle H. Moe, fødd i Odda i 1988 og no busett i Bergen, har sidan 2010 dokumentert den bergenske musikkscena, med særleg fokus på ekstremmetall og black metal. Moe har ei eiga evne til å fange eksplosiv kraft i bilete; du kan verkeleg kjenne varmen frå pyro-flammane og lukta frå griseblodet (!) riv i nasen. Samstundes viser porteføljen hans enorm breidde; alt frå Taylor Swift til Gorgoroth via jazz, country, hiphop og folkemusikk. Det meste er representert.

Dei siste åra har han hatt tallause oppdrag for kjende musikarar som Lionel Richie, Madrugada, Hellbillies, Gunslingers, Eva Weel Skram og Sissel Kyrkjebø, og norske og utanlandske publikasjonar, som Metal Hammer, Politiken, NRK, VG, Dagbladet, TV2 og Klassekampen.

Moe har sidan 2012 vore fast festivalfotograf for både Bergenfest og ekstremmetallfestivalen Beyond the Gates. I 2023 hadde han i samband med Beyond the Gates ei eiga utstilling basert på festivalen si historie, “Over Bjørgvin Gråter Himmelriket” - sjølvsagt dekorert med sauehovud, i tråd med festivalen sitt visuelle uttrykk.

Sidan 2017 har han også vore Litteratursymposiet sin faste fotograf, og har fanga store og små augeblikk frå festivalen både på bilete og video. Moe sin stil er særmerkt ved at han har eit like godt blikk for dei små augeblikka som for dei store og eksplosive.

I løpet av dei 15 siste åra har Moe “skote” over 2 millionar bilete og har bygd opp eit rikt arkiv. Når symposiet no markerer 20. årsjubileum og temaet er EKSPLOSJON er Moe sjølvskriven som årets utstillar på Litteratursymposiet. Årets symposieutstilling vil vise eit utval av Moe sine bilete frå Litteratursymposiet si historie, i tillegg til andre bilete frå det fotografiske virket hans.