Ein samtale om kunst og begjær, og om Lars Korff Lofthus sin kunstnarlege praksis. 

Biletkunstnar Lars Korff Lofthus har sommaren 2024 ei omfattande separatutstilling i Kristiansand Kunsthall. I samband med dette vert også boka Lars Korff Lofthus: ATTRÅ gjeve ut. Boka er ein kunstnarmonografi som presenterer og undersøker Lars sin kunstnarlege praksis, med hovudvekt på dei siste fire separatutstillingane hans. Boka inneheld eit hovudessay av sosiolog og forskar innan kulturfeltet, Merete Jonvik, og eit essay som kulturskribent, -kritikar, og kurator Bjørn Hatterud skreiv om arbeidet hans i 2022, i tillegg til forord av redaktør Cecilie Almberg Størkson, og dessutan ein tekst skriven av Lars sjølv.

Boka vert lansert i Kristiansand Kunsthall 24. august i samband med at Lars har ei omfattande separatutstilling der sommaren 2024. I oktober skal boka lanserast i Paris, der Entrée og Lars stiller ut på kunstmessa Paris Internationale. 

Lars Korff Lofthus møter Merete Jonvik til samtale om kunst og begjær, og om Lars Korff Lofthus sin kunstnarlege praksis.

Utdrag frå essayet til Jonvik:

"Kva skil tradisjonar frå konvensjonar? Kva får plass i tradisjonane? Kor mykje kan dei bøyast og tøyast? Korff Lofthus brukar det tradisjonsrike, gir det nye fargar, design, kontekstar. Puttar noko nytt inn i noko eldre. Puttar seg sjølv inn i tradisjonen. For kunstnaren er òg ein karakter i sin eigen kunstnariske praksis, og slik er det kanskje for alle, men særskilt tydeleg hos Korff Lofthus gjennom måten han brukar den stadbundne praksisen til å finna ut korleis han kan vera, den han er, der han er, saman med andre. Tematiserer identitet. Tematiserer begjær. Tematiserer det å høyra heime.”